同佢一齊的確好舒服,一啲都冇壓力,但係我發現佢好似同我一齊得太舒服,成日會無視我、唔理我。佢好鍾意同我分享好多我一啲都唔感興趣嘅嘢,一開頭我當然一啲都唔介意,例如男人好鍾意車,即使我對車一啲興趣都冇,我都會陪佢傾,佢講嗰啲嘢我唔明就會主動問佢,佢講運動嗰啲嘢,我聽唔明都會一路笑一路應佢。佢又好鍾意講埋啲男人覺得好好笑,但係女仔會覺得好x幼稚嘅嘢,我真係一啲都唔介意,甚至好鍾意聽佢分享。因為就算冇乜興趣,都會有啲搞笑嘢。
直到大概兩個月之前,佢成日都會唔小心無視咗我,一開頭係messages ,佢唔會唔覆我,但係永遠同佢講完啲嘢佢係同冇聽過一樣,但係佢明明就有聽,只係冇用心聽。本身都覺得冇乜嘢,覆個message啫使乜咁介意。去到後尾,佢成日問完我啲嘢,我答咗佢之後佢又會係咁問,不斷重複問,答咗等於冇答咁,有時仲要聽完我啲錄音自己唔記得咗,然後就會吹9我答佢or話我唔答佢。大家可能覺得message啫,有咩所謂但係當一個人每一日都係咁樣同你講嘢,其實真係都幾煩。慢慢開始我同佢講嘢佢唔會應我(唔係message),唔係諗唔到唔答我嗰種,係我講完之後我要諗佢究竟有冇聽嗰種,唔俾反應,然後下1秒開始勁開心咁繼續分享佢嗰啲又車又樓又波嗰啲嘢。
我之前不嬲都會同佢分享好多嘢,我讀書啲嘢佢聽唔明,音樂啲聽唔明,打波啲嘢都聽唔明,女仔心思嘅八婆嘢佢更加聽唔明,我唔會怪佢,因為佢聽唔明唔係佢控制到。所以我之後基本上講親啲嘢都係大家可以理解到嘅嘢,而且開始慢慢分享嘅嘢都越嚟越少。點解?因為我發現無論件事佢理唔理解到,聽唔聽得明,佢都係唔俾反應我。
頭嗰幾次咁樣嘅情況,我都有好嗲態度超級好咁樣同佢講,因為我覺得如果冇必要嘅話就唔想話佢,我亦都相信我態度好啲咁樣同佢講佢會更加容易理解我嘅感受。講過好多好多次,直到有一次我真係頂唔順就唔小心喊咗出嚟,佢覺得好心痛嘅,有say sorry氹我,我亦都知道佢唔係有心唔俾反應我,純粹就係唔知點解冇理我。咁既然佢都唔係有心,我都冇再特別再提過。
去到後尾唔知係咪真係同我一齊太舒服,佢無論出街定係喺屋企都長期拎住手機,睇波睇車睇樓或者youtube,搭車佢會自己帶自己耳機,唔會問我要唔要一齊聽。食飯佢會自己開自己啱睇嘅youtube,基本上都係睇男人先會感興趣睇嘅嘢,唔會問我有冇嘢想睇,淨係會話想睇就一齊睇,唔想睇就分開睇。夜晚一齊睇Netflix嘅時候,我每次都會有嘢想睇,而我每次講出嚟嗰套戲我都好肯定係我哋兩個大家都會有興趣嘅戲,但係佢幾乎每一次都同我講:「但係我好想睇呢套喎今日」呢啲咁嘅嘅嘢。都係嗰句,我唔介意陪佢睇佢想睇嘅嘢。但係每一晚佢都有嘢想睇,而我想睇嘅嘢永遠都冇得一齊睇。同我出街嘅時候又攞住部手機喺度睇波,我除咗睇住佢睇波or我同佢一齊睇,我仲有得揀咩?
認真講過幾多次,佢都冇乜點改變。好似我嘅感受唔係感受咁,但係我又真係好鍾意佢,亦都好肯定佢好愛我,萬分肯定嗰種。有次因為共同朋友,佢知道咗我成日會因為呢啲事好唔開心或者喊,佢就慢慢開始改,到而家其實已經唔會唔理我咁濟。但係可能因為之前每次我想講嘢佢都會一係打斷我、一係拎住部手機聽我講嘢、一係帶住個耳機聽我講嘢、一係就我講完佢冇反應。久而久之我分享慾都少咗好多,對佢分享俾我嗰啲嘢亦都越嚟越冇耐性。大家可能會問我點解呢啲事唔直接同佢講要自己收埋唔開心,因為佢係一個唔識氹人嘅男仔,淨係識得say sorry,所以就算我同佢講我唔開心,最後我都係自己氹返自己開心。我feel到佢已經好努力嘗試去氹我,但係通常佢好努力氹完我,我都係0開心返。
但係我而家好迷惘嘅係,我對佢講又車又樓又波嗰啲嘢我已經冇晒耐性去聽。一個唔中意車嘅女仔識得晒幾乎所有車嘅牌子,見到架車已經知架車咩牌子、咩型號,知道埋啲車係日本車英國車歐洲車定係國產車,知道埋邊啲車要成$1-2 一公里,邊啲車幾毫子一公里,連邊啲車喺香港冇得買要外國混入嚟,都已經聽到識背曬。點解?因為我唔知係咪個個男人都會拖住自己條女隻手去停車場逐架逐架車介紹。我亦都已經冇晒分享慾咁滯。
但係我仍然仲係好鍾意好愛佢。自問自己都算係一個幾好嘅女仔,同佢啲frd又好傾得計,我會好理解佢,又唔會亂發脾氣,就算唔開心扭計都會同時諗埋佢嘅感受。無論佢係因為我定係因為其他嘢唔開心,我都好識得喺佢角度諗,好快就氹到佢開心返晒(開心返之後又會繼續分享嗰啲我唔x想知嘅嘢)。但係佢又唔識得氹返我開心,好難返去以前咁樣同佢相處,所以都唔知啲分享欲要點樣先可以返返嚟?係我太小氣定係真係誇張呢?希望各位男仔可以認真俾啲意見我😭定係其實個個男朋友都係咁㗎?係唔係個個女仔都有同我一樣嘅感受㗎?😭冇晒分享慾好大鑊,我好愛佢但係真係冇晒耐性聽佢講啦😭
轉載自Couple.murmur 港愛情 [gfmurmur11507]