Home觀眾投稿打從心底唔鍾意男朋友父母

打從心底唔鍾意男朋友父母

文章分類

未結婚都咁,結咗婚仲得了?

女27,一齊兩年幾,呢個問題已經困擾咗我好耐,希望大家可以幫幫我🙏🏻

一直都知同佢哋唔會夾,佢父母一日到晚鍾意碌抖音,開口埋口都大陸咩好等等。文化差異太大。但因為係男友嘅屋企人,第日又唔會一齊住,間唔中見面又冇乜問題,都盡量同佢哋相處。

一齊咗半年都冇嗰時,有次上佢屋企食飯,男友又遲收工得我同兩老三個人食。當時佢阿媽已經係咁催結婚,話我年紀都唔細,係時候要結婚生仔。然後仲話到時就掉咗隻貓佢🙂本身男友有養一隻貓,佢屋企人已經好唔鍾意要困喺房,成日都話佢又臭又污糟。

另外佢父母傳統觀念好重,我同男友一早決定咗唔生小朋友。當佢同佢阿爸講我哋唔會生,佢阿爸就話唔生仔結婚嚟做咩,同叫雞有咩分別。由嗰時開始已經對佢哋反感。

去到上年年中,我屋企人買咗層樓寫我名,知道我一直都好鍾意貓,想我有自己嘅屋企。尤其阿爸唔係咁鍾意小動物又嚴重敏感,都支持我,我好感恩。搬出嚟住後每個月俾多咗錢交家用,亦都開始真正同居,我自己亦領養多咗兩隻貓貓,雖然生活使費大,但我好滿意咁樣嘅生活。

搬出去住之後間中有陪男友同佢父母飲茶,幾乎每一次見面佢阿媽都不斷催結婚。同男友本身都係認定嘅伴侶,但未有咁快結婚嘅打算,每次講我都好大壓力。加上成日問我幾時安排四大長老見面,但佢知我屋企家境係點,就自卑撚上身,話:不過我哋都高攀唔起㗎啦~ 佢已經認定咗我屋企人睇唔起佢,我更加唔敢想像第日真係見面試會點樣。

最近就成日提要我男友買樓,佢兩老會幫手俾首期。但要我同男友一齊供。佢知道我有層樓係手,想我租出去俾人住,我哋就住男友層樓,咁收租嘅錢就可以用嚟供樓同幫補家計。男友同我都係同一陣線,覺得而家住得好地地,唔想亦唔需要咁辛苦供層樓。但我哋將呢個想法話俾佢知之後,佢阿媽批評:間屋風水唔好,又唔夠大,廚房又細廁所又細,但好彩地理位置唔錯,可以租俾人等我哋供樓唔使咁辛苦囉~我都係俾啲建議你哋啫~之後繼續chur我哋買樓。

買樓講唔過,就想我哋搬返去住佢間公屋。佢嘅諗法係:佢兩老返大陸住,我同男友同男友阿妹住。咁佢阿妹本身又驚貓又過敏,我又唔會將貓困籠咁養,根本冇可能一齊住。然後佢媽好認真咁提議:咁不如將啲貓送返大陸啦~

我嗰下即刻上晒火‼️靜咗講唔出嘢,塊面都黑咗,俾唔到反應佢。我男朋友sense到都有即刻鬧佢阿媽,但佢阿媽都係繼續講。由嗰刻開始覺得好嘔心好恐怖,平時講咩都好我都可以忍,但佢踩中咗我底線。

曾經有同男友傾過,覺得佢阿媽講嘅嘢令我有壓力。佢表示會企喺我呢邊,會阻止佢。但依家每次見親佢阿媽,我都會係咁諗佢今日又會講咩。我間唔中同朋友呻吓,大家都覺得佢阿媽好有問題。但始終都係另一半嘅屋企人,就算唔一齊住,第日結咗婚都唔會完全唔見。甚至我有啲恐懼,結婚要當另一半嘅父母係親生父母,我完全接受唔到。

想問問過來人,如果係你哋會點做??

轉載自 Couple Murmur [gfmurmur11371]

正在尋找認真的關係?