他有負於你。 出軌又好，說謊又好，不重要，總之全世界都知道他有負於你。 既然分手是一個必然結局，你覺得唯一可以做的，是嘗試拿到最後一點的優越感。 於是你跟自己說：「佢咁樣對我，我諗佢點都會有啲覺得對我唔住，無論如何，我應該會係佢人生中嘅一個遺憾，佢應該點都會記得住我呢個人。」 你這樣一想，然後心裡舒服了一點。你每天也會Stalk他的IG。 一個月後，他與那個新歡分手了，他留下了一張全黑Story。 兩個月後，他失業了，影下了兩個啤酒罐與一堆煙頭。 三個月後，他生病了，於是Post了一堆藥丸與藥水的黑白照。 四個月…五個月…六個月… 半年以來，他訴了不少的苦，面對過不同難關，然而……. 「在這些遺憾內，你的名字從來沒有出現過。」 你不及那個只戀愛了一個月的新歡、你不及那份只有$12K的薪水、你不及那個只引起了兩聲咳嗽的傷風。 你聽到了陳奕迅那首《我們》：「我最大的遺憾，是你的遺憾，與我有關。」 你搖搖頭，覺得歌詞寫錯了。 「我最大的遺憾，是你的遺憾，與我無關。」 嗯，好聽多了。 轉載自 @tong_ping_

我啱啱畢業，啱啱返工，公司派咗個師兄帶住我做嘢。佢嘅外型好charm，第一眼見到佢就俾佢吸引。佢好肯教我做嘢，做唔到同做錯嘅時候都唔會俾說話我，會鼓勵返我。佢份人好有智慧，每次做treatment都好認真，有紋有路咁，認真做嘢嘅男人好型。 我就慢慢對佢心動，但請佢唔好鍾意我，我唔想同佢有進一步嘅關係，我只想單戀。原因一我有男朋友，佢有女朋友，我無意破壞任何人嘅關係。原因二我同師兄性格差異太大，就算一齊最後只會因為性格不合而分開。原因三年齡差太多。原因四我接受唔到辨公室戀愛。原因五我男朋友係我嘅精神支柱，我離開唔到佢。原因六同師兄一齊嘅話，佢喺我心中嘅形象就會破滅。原因七，亦都係最大原因，我只愛我男朋友一人。 我好鍾意一句說話，【心動是本能，忠誠是選擇】，只要我咩都唔做，對第二個男人心動又有咩錯。依份心情只係放喺心中，只有我自己知道，唔去作出任何行動，難道係出軌，係有錯？對一個人心動並非可控之事，我可以做到嘅就係咩都唔做。我好有自信自己唔會過界。 最後，我想講，有住依份心情唔係壞事，至少俾到我工作動力，每日都係想師兄欣賞我而努力工作，做個更好嘅人。所以我唔會迫自己強行放低依份感情，順其自然就好了。 轉載自 @couplemurmur

第一次見既時候，我仲係18歲，佢係一個廚房佬，當年我入黎做parttime樓面，我只係食飯先見到佢一面，果陣未係中意既，佢外表唔算出眾，但果一眼就係好深刻。到後來我調左做水吧，成日同佢一齊開早，相處時間多左，就行得愈黎愈埋。經過一段時間，我地一齊左。 佢一開始對我真係好好，我人生第一次收花、電話做禮物。我細個屋企好窮，所以有個男仔送禮物比我，我真係好感動。 佢屋企環境都唔係好好，所以到我讀完書畢業既時候，我地一齊儲錢，然後我帶佢去左佢人生第一次旅行。當時我以為我地可以一齊經歷更多。 到社運果年，我去銅鑼灣接佢收工，點知圍捕，比人拉左去北角。（堅係一到銅鑼灣就圍捕捉左，乜都冇做過😑）果陣個人好驚，係佢成晚冇訓，陪我屋企人搵我，到我可以出黎既時候，都係佢黎接我。 我真係以為我地可以行到好遠。 點知佢突然變得好冷淡，每次搵佢都話忙（後來我轉左工，唔係同事了）唔比我去接佢收工，唔比我去佢屋企等佢放工返黎。 其實我發現好多野，偷𣈴到佢有同人send充滿心心sticker既msg，見到佢同另一個女仔互相share location，知道佢新買既電話就係果個女仔比錢既，睇到佢另一個whatsapp既states係曖昧既說話，撞過佢收工想搵果個女仔 礙於佢見到我 所以即刻拉住我走左，突然間有名牌袋同銀包...... 我唔想認...但明明我說服唔到自己...呢d行為會係”冇野”，一直拖左兩年...到早幾日，我終於見到一個舊同事既story，影到佢兩個一齊食飯，食同一份餐，果種自然，就好似已經一齊左好耐既情侶咁...個story有tag佢地，原來佢地都有另一個ig... 我一直唔信，因為女方係佢做果間餐廳既太子女，又有一個同佢一齊大學畢業既男朋友，點會睇上我前度，一個有女朋友，中三未畢業，欠債，英文都唔識多個既男人... 醒了，我只我咁樣係好小器好幼稚，祝佢地永結同心，然後家道中落。 各位係感情中掙扎既女仔，如果你地有唔好既懷疑，請相信你既直覺，正視自己既感覺。相信自己，你好好，你一個人都可以好好，世上唔係所有人都值得你溫柔理性對待。分開係好痛苦，特別係愛情長跑既斷裂，但如果對方已經不忠，你唔離開，只會延長呢種痛苦。你的溫柔應該要有尊嚴。 轉載自 couplemurmur

小妹28歲，岩岩新婚，同老公拍左10年拖，終於去到修成正果。但最近公司有隔離team同事approach 我。我都知道咁樣做係好怪，不過我實在太唔清醒，希望大家可以鬧醒我，我真係太沉了。 男同事大我十年，已離婚，有兩個小朋友。佢接觸我時，我其實一早聽人講已經知道佢離左婚有小朋友，但唔知點解佢無同我講佢已離左婚，不過有一直同我表達有小朋友，佢有幾鍚佢既小朋友，而佢唔想再搵另一半。 一開始佢好熱情，不斷搵我，又講一啲好令人誤會既說話，不斷讚我陪我傾計陪我傾訴。到我開始慣左同佢日日message, 佢一個月後突然清醒，突然同我講佢唔會鐘意公司女同事，但又同我講佢好幾年前曾經同過幾個女同事有過曖昧，但全部佢都拒絕哂，只有一個佢真心鐘意。 之後再隔一星期，佢又突然搵番我，話大家可以好似朋友咁相處，有咩事佢都會support 我，大家又傾番計，但發展到已經好曖昧，會直接表達掛住對方，好鐘意對方。 如是者又過一個月，佢又突然好冷淡，我忍唔住問佢大家係咪仲係朋友，佢隔左幾日先應番我：我地當然仲係朋友，但又突然同我講佢要自己一個一陣子，因為佢真係好忙。因為我有同佢合作關係所以我都知佢好忙，但我公司又唔係果種忙到要ot, 每一刻都要做野，佢仲可以準時收工，做佢自己既事，只係有時要remote work. 呢3個月，我其實有直接求證佢係咪已經離左婚，佢好shock咁發現我知道，但都承認咗，仲好直接講離婚原因比我聽，佢仲會同我承認佢曾經有沉過同事船，不過又係乜關係都無發生，因為佢係個好人，唔想傷害人。 我反覆去思考自己究竟呢幾個月做緊乜，點解會沉船，但又真係控制唔到自己去掛住佢，好想去撩番佢講野，工作上對佢特別冷淡，等佢留意我。 如果個男仔搵番我，我應該係會沉落去，同埋我仲係好想知點解個男仔可以失驚無神就消失，究竟佢有無鐘意過我，定為我好先離開，定我幫佢諗太多，佢根本係無聊寂寞搵人zip 時間？其實佢唔想傷害人，咁點解一開始咁主動搵我？ 我知道件事好奇怪，好錯。 以前細個或者呢件事之前我睇到d 娛樂八卦新聞，我總係會覺得出軌就是錯，到今日，我竟然係覺得人一生，點解要限死同一個伴侶，點解唔可以openmind d, 點解一定就係錯。我竟然會有呢種諗法。 我平時睇開唔同comments, 我都以為自己有既定諗法，估唔到到依家親身經歷，真係控制唔到自己對佢有feel.. 希望大家可以比下意見，或者屌細力d..或者我只係執著個原因。 轉載自 @couplemurmur